آخری ون ڈے : پاکستان کی افغانستان کیخلاف بیٹنگ جاری

کولمبو: پاکستان اور افغانستان کے درمیان آخری ایک روزہ میچ میں پاکستان کی افغانستان کے خلاف بیٹنگ جاری ہے۔پاکستان اور افغانستان کے درمیان تیسرا اور آخری ون ڈے میچ آج کولمبو میں کھیلا جارہا ہے ، پاکستان نے ٹاس جیت کر بیٹنگ کا فیصلہ کیا اور افغانستان کو فیلڈنگ کی دعوت دی۔
ٹاس کے بعد گفتگو کرتے ہوئے پاکستان کرکٹ ٹیم کے کپتان بابر اعظم نے کہا کہ آج پہلے 10 اوور مشکل ہوں گے، زیادہ سے زیادہ رنز بنا کر افغان ٹیم پر دباؤ بڑھائیں گے۔
بابر اعظم کاکہنا تھا کہ میچ کے لیے ٹیم میں 4 تبدیلیاں کی ہیں ، سعود شکیل، فہیم اشرف، محمد نواز اور وسیم جونیئر کو ٹیم میں شامل کیا گیا ہے جبکہ حارث رؤف، نسیم شاہ، افتخار احمد اور اسامہ میر کو آرام دیا گیا ہے۔
دوسری جانب افغانستان کے آل راؤنڈر عظمت اللہ عمرزئی سائیڈ اسٹرین کی وجہ سے میچ سے باہر ہوگئے، آل راؤنڈر گلبدین نائب کو آج ہونے والے میچ کے لیے افغان ٹیم میں شامل کر لیا گیا ہے۔
یاد رہے کہ تین ون ڈے میچز کی سیریز میں پاکستان کو دو صفر سے برتری حاصل ہے ۔
واضح رہے کہ آج کا یہ میچ جیت کر پاکستان ٹیم ون ڈے رینکنگ میں نمبر ون پوزیشن پر آ جائے گی۔